Umboðsmannatingið í USA hevur loksins góðtikið ein risastóran hjálparpakka til millum annað Ukraina. Republikanararnir hava leingi forða pakkanum, men nú gekk hann ígjøgnum, tí Ísrael og onnur sameind hjá USA eru eisini við.
Góðtekur Senatið eisini pakkan eru 61 milliardir dollarar í krígshjálp ávegis til Ukraina. Joe Biden, forseti, hevur biðið Senatið kvika sær, so hann kann seta sína undirskrift á lógina.
Ukrainski forsetin, Volodomyr Zelenskyj, sigur í viðmerking á sosiala miðlinum X, at hjálpin úr USA er kærkomin. Hon fer at steðga framgongdini hjá russum og spara nógv ukrainsk mannalív.
Russar siga hinvegin gjøgnum tíðindastovuna TASS, at stuðulin fer at gera USA ríkari men eisini gera, at fleiri ukrainar doyggja.
Jens Stoltenberg, Nato aðalskrivari, hevur sagt, at stuðulin fer at gera øll tryggari, bæði í Europa og Norðuramerika.
Um tú veitst okkurt, sum VP ikki veit - skriva so til vp@vp.fo
